Aron skal við til Moldova

Aron Benjaminsen skal við A-landsliðnum til Moldova í kvøld og verður eftir øllum at døma eisini við til heimadystin ímóti Slovakia og útidystin ímóti Kasakstan, skilir Kringvarpið.

Vongurin skeyt so seint sum í gjár tvey góð mál fyri U21-landsliðið, sum vann 2-1 á Estlandi í EM-undankappingardysti í Pärnu og kom upp á 12 stig, sum er U21-met.

LES EISINI: Aron sendi góða umsókn til A-landsliðsvenjararnar

Um tað var avrikið í Estlandi, sum hevur sannført landsliðsvenjararnar, ella um ætlanin frá byrjan hevur verið at tikið Aron Benjaminsen við til Moldova, er óvist, men Eyðun Klakstein lat eitt pláss í hópinum standa tøkt til úttøkuna fyri kortum.

18 ára gamli vongurin, varð fyri kortum seldur úr Víkingi til Hearts í bestu skotsku deildini, har hann framvegis bíðar eftir sínum fyrsta dysti.