Óli og teir fremstir eftir sigur í toppdysti

Góða gongdin hjá Óla Mittún og GOG helt fram, tá tað eydnaðist at vinna toppdystin á Ribe-Esbjerg mánadagin.

Óli Mittún hevur spælt seg glóðheitan í gulu og reyðu troyggjuni, og aftur hesa ferð var føroyska landsliðsstjørnan í miðdeplinum.

Bakspælarin skoraði fimm ferðir upp á tilsamans níggju skotroyndir og legði upp til seks onnur mál hjá fjónliðnum. Í mun til onkran annan dyst í seinastuni var bakspælarin ikki líka effektivur upp á skotmøguleikarnar, men tá tú eigur seinastu ella næstseinastu hond á 11 málum er ikki nógv at klaga um.

Serliga ikki tá tað endar við sigri. Dysturin var annars javnur, og tá umleið átta minuttir vóru eftir at spæla, var støðan 26-26, men so fór GOG undan og vann 36-31. Millum annað við hjálp frá føroyinginum.

GOG hevur 13 stig á 1. plássi frammanfyri Ribe-Esbjerg og Aalborg, sum hava 11 stig í part.