Kommunur sleppa kanska at brúka vakmyndatól

Nú er loyvið hjá kommunum at brúka vakmyndatól aftur frammi.

Landsstýrið hevur gjørt uppskot um lóg, sum gevur kommunum heimild til at hava vakmyndatól við serliga ábært øki, sum verður nýtt til vanliga ferðslu.

Endamálið er at økja trygdina.

Í uppskotinum verður sagt, at kommunustýri í samráð við politiið og eftir tilmæli frá politinum, kann vaka yvir øki, sum verður nýtt til vanliga ferðslu, við vakmyndatóli. 

Tilmælið frá politinum er galdandi í tvey ár. 
 
Upptøkur kunnu gevast politinum sambært rættarúrskurði.

Onnur enn politiið kunnu viðgera upptøkur, um hetta er neyðugt í sambandi við revsimál. 

Upptøkur skulu, sambært lógaruppskotinum, strikast í seinasta lagi 30 dagar eftir upptøkuna. 

Kommuna, sum setur upp vakmyndatól, er dátuábyrgdari.

Uppskotið er til hoyringar til 26. november.