- Tíðindi, mentan og ítróttur
Nevningatingið heldur fram í næstu viku

Nevningatingið um tveir menn, sum eru ákærdir fyri serligan grovan og ráan harðskap, fyri at royna at seta eld á og fyri hóttan og rán, heldur fram í Føroya rætti í næstu viku.
Alt hetta skal vera hent í einum sethúsum í Havn tíðliga um kvøldið 18. februar.
Báðir menninir nokta seg sekar.
Føroya rættur hevur sett av tveir dagar í næstu viku til nevningatingið.
Nevningatingið útsett
Málið er longu komið nakað áleiðis. Nevningating var síðst í september. Men tað var útsett 30. september.
Eitt vitni var burturstatt. Ákæruvaldið helt, at ikki var neyðugt at hoyra vitnið. Men annar verjin helt fast uppá, at tað vitnið skuldi avhoyrast. Og tí var málið útsett.
Nú er eftir at avhoyra tvey vitni, og so verður proseduran.
Dómurin kemur í næstu viku.
Báðir teir ákærdu hava verið í varðhaldi síðani 19. februar.

























