Hans Jørgen Djurhuus dømdur fyri harðskap á vølli

Talan er um ein treytaðan dóm í eitt ár, men dómurin er uttan revsiáseting.

Tað merkir, at fremur Hans Jørgen Djurhuus ikki líknandi lógarbrot næsta árið, verður hann ikki revsaður fyri harðskapin, hann í dag er dømdur fyri.

Ger Hans Jørgen Djurhuus hinvegin okkurt líknandi næsta árið og verður revsaður fyri tað, verður hendingin, hann nú er dømdur fyri, møguliga løgd aftrat og revsingin kann tí blíva harðari, enn hon annars hevði verið.

Breyt nøsina

Tað var í venjingardysti tann 20. januar millum HB og Vìking, at Hans Jørgen Djurhuus breyt nøsina á Poul Ingasyni, tá Hans Jørgen Djurhuus, sambært dóminum, slóg við knýttum neva.

Hans Jørgen Djurhuus og verjin  siga seg nú fara nærlesa dómin, áðrenn teir taka støðu til, um teir kæra ella ikki. 

Fótbóltssambandið hevur sagt, at tey ikki hava slept málinum, men hava bíðað eftir einum dómi. Nú eru boðini, at tey taka málið upp á starvsnevndarfundi í næstu viku.