Vildu tøma felagið

Tað mundi eyðnast fyrrverandi stjóranum í Northwest Pelagic at tøma felagið, teir ráddu yvir, fyri stór virðir. Útlendsku partaeigarararnir í felagnum fingu tó frænir av ætlanini, og tí varð handilin steðgaður í síðstu løtu.

Dánjal Johansen og Hans Trygvi Teirin vildu ikki gera samrøðu til sendingina í dag. Vit ætlaðu at spyrja teir, um tað ikki var at skaða felagið, sum teir arbeiddu fyri, at selja loyvini hjá Atlantsfarinum úr felagnum.

Vit ætlaðu eisini at spyrja, um tað ikki var at snýta hollendsku lánveitararnar og partaeigararnar í felagnum, at teir tóku eina so stóra avgerð uttan, at tað var viðgjørt í nevndini hjá felagnum?

Hans Trygvi Teirin hevur tó skrivað okkum hesa viðmerking:

Mest avgerandi er at fáa sagt, at umrødda søga um keyp og sølu hevði eittans endamál – og tað var at bjarga tí, sum bjargast kundi til frama fyri eigarar og áognarar. Minnilutaeigarin og áognarin valdu at samstarva við aðrar føroyingar, og tann søgan er kend frá fjølmiðlunum.

Atlantsfarið – sum nú eitur Norðhavið – liggur enn á Skála, tí myndugleikarnir kanna útlendska partin í felagnum.