Sleppa ikki av við bummgjaldið

Landsstýrismaðurin í samferðslumálum royndi í dag at sissa vágafólk, sum hava hótt við at stevna landsmyndugleikunum, verður bummgjaldið í Vágatunlinum ikki strikað.

Men fundurin broytti einki.

Landsstýrið heldur fast um, at sambært lógini er Vágatunnilin ikki afturgoldin, fyrr enn partapeningurin, sum landið sett í felagið, eisini eru goldin aftur.

Harafturat skulu pengar eisini brúkast til viðlíkahald, og tí verður bummgjaldið ikki strikað.

Henrik Old, landsstýrismaður sigur tó, at talan kann verða um at lækka tunnilsgjaldið.

Vágafólk taka ikki undir við lógartulkingini hjá landsstýrinum og arbeiða víðari við ætlanini um at stevna landinum.