Vil hava hjálparpakka 1 úr gildi um mánaðarskiftið

Av teimum 1.839 fólkunum, sum framvegis eru í serskipanini, eru 500 úr ferðavinnuni, og 400 úr fiskivinnuni. Hini eru úr at kalla øllum vinnugreinum.

Stjórin í ALS væntar ikki, at øll, sum eru í serskipanini í dag, flyta yvir í vanligu arbeiðsloysisskipanina. Fleiri teirra sleppa eftir øllum at døma aftur í arbeiði í næstum.

Serskipanin hevur kostað ALS-grunninum 98,9 milliónir krónur.

Sjálvt um landsstýrismaðurin vil hava skipanina úr gildi um mánaðarskiftið, so vilja Christian Andreasen, sum er formaður í tingbólkinum hjá Fólkaflokkinum, og onnur tingfólk í samgonguni hinvegin hava skipanina at halda fram eina tíð afturat.

Arbeiðsloysið er tvey prosent

Fólk í serskipanini hjá ALS eru ikki skrásett sum arbeiðsleys. Tí er arbeiðsloysið í Føroyum í dag lægri enn tvey prosent.

Men tá ið serskipanin fer úr gildi, fer arbeiðsloysið helst eisini upp. Og hetta ávirkar atgongdina hjá fyritøkum til útlendska arbeiðsmegi.

Helgi Abrahamsen, landsstýrismaður í vinnumálum, stúrir fyri, at Føroyar fara at innflyta arbeiðsmegi, samstundis sum nógvir føroyingar eru arbeiðsleysir.