Venjingardystir á heimavølli koma væl við

Fyri fyrstu ferð í 17 ár spælir føroyska fótbóltslandsliðið við monnum venjingardystir á heimavølli. 4. og 7. juni spæla Føroyar ímóti ávíkavist Íslandi og Liktinstein á Tórsvølli.

Hetta eru spennandi mótstøðulið og ein spennandi møguleiki at royna ymiskt nýtt, halda bæði venjari og liðskipari.

– Grannar okkara, Ísland, er eitt spennandi mótstøðulið, sum hevur staðið seg væl í undankappingum. Tað er eitt lið, sum er sterkt í innleggum bæði offensivt og defensivt, sigur landsliðsvenjarin, Håkan Ericson.

– Vit kunnu loyva okkum at nýta meiri tíð at venja uttan at taka eins nógv atlit til arbeiðsbyrðuna, so hetta eru virðismiklir dagar fyri okkum, sigur venjarin.

– Hetta eru tveir góðir møguleikar, sum vit fáa her. Serliga tað, at tey koma til Føroya. Tað er gott fyri okkum spælarar, men eisini áskoðararnar, sigur liðskiparin, Hallur Hansson.