VIDEO: Stórur savnsdagur í Kringvarpinum fríggjadagin

Søvn okkara skulu raka øll fólk og vera viðkomandi fyri øll. Søvn savna, skráseta, varðveita, miðla og granska. Hetta eru fimm temu, sum eyðkenna Savnandi savnsdagin 3. juni, sum SavnsGull, verkætlanin at bjarga tilfari úr Kringvarpinum, hevur tikið stig til at fyriskipa.  

savnsgull, kringvarpssavnið

Vita fólk í grundini, hvørjum verður arbeitt við í einum savni, og hvønn týdning arbeiðið hevur fyri almenningin? Savnandi savnsdagurin er sprottin burtur úr hesum spurningum í vón um at koma fram til eitt svar.  

Eftir at løgmaður hevur bjóðað vælkomin, fara umboð fyri Kringvarp Føroya, Landsbókasavnið, Tjóðskjalasavnið, Listasavnið og Tjóðsavnið henda dagin at hava framløgu um hvør sítt tema. Eisini fara Bergur Djurhuus Hansen frá Føroyamálsdeildini á Setrinum og Annika Sølvará frá Granskingarráðnum at koma við sínum íkasti til, hví søvn eru so týdningarmikil í einum samfelagi. 

Savnandi Savnsdagur, Savnsgull

Savnandi savnsdagurin er fyri øll, sum hava áhuga í at læra meira um, hvørjum søvnini í Føroyum arbeiða við, ella sum fáast við savnsarbeiði. 

Savnandi savnsdagurin verður 3. juni kl. 13-16 í forhøllini í Kringvarpi Føroya, Norðari Ringvegur 20.

Gott hevði verið, um luttakarar boða frá luttøku við at senda teldupost til: bjorn@kvf.fo 

Skrá 
13:00-13:10    Løgmaður bjóðar vælkomin
13:10-13:20    Intro til dagin
13:20-13:35    Bergur Djurhuus Hansen / Spjadd søvn í talgildum heimi
13:35-13:55    Kringvarp Føroya / Savna / Ein gluggi til vitan (Ivan Hentze Niclasen)
13:55-14:15    Landsbókasavnið / Skráseta / Skráseting av føroyskum verkum og verk um føroysk viðurskifti (Høgni Bech)
14:15-14:35    Tjóðskjalasavnið / Varðveita / Hví varðveita persónupplýsingar? (Sámal Tróndur F. Johansen)
14:35-15:05    Steðgur
15:05-15:25    Listasavn Føroya / Miðla / Upplivingar fyri øll – um at miðla á Listasavni Føroya (Dagmar Malena Winther)
15:25-15:45    Tjóðsavnið / Granska / Nyttan av djórasøvnum lýst við dømi í koronukanningartøkni (Jan Sørensen)
15:45-16:00    Annika Sølvará / Søvn sum granskingaramboð – Gullnám ella eskjan hjá Pandoru