Hermenn farnir heimaftur - hava gjørt innleiðandi arbeiði

Nakrir av hermonnunum, sum fóru til Grønlands í síðstu viku, eru nú á veg heimaftur. Talan er bæði um týskar og norskar hermenn og yvirmenn.

- Endamálið var at gera tað innleiðandi arbeiði at kanna møguleikarnar fyri víðari samstarvi við sameind um at styrkja trygdina í Arktis, sigur Stine Barclay Gaasland, fjølmiðlafólk í norska herinum.

Men at nakrir hermenn fara heimaftur, merkir ikki, at herfólk ikki verða at síggja í Nuuk og aðrastaðni í Grønlandi í framtíðini, skrivar DR.

Danska verjan skrivar, at í tíðarskeiðum fara bæði danskar og altjóða venjingar at vera í Arktis og Norðuratlantshavi.

Fleiri veningar í næstum 

Um vikuskiftið vóru F-35 stríðsflogfør yvir Grønlandi eins og flogfar, sum letur brennievni. Fleiri tílíkar venjingar vera á sjónum og á landi í Grønlandi í næstum, skrivar danska verjan. 

- Kannað verður, um til ber at gera NATO-venjingar í Grønlandi, sum ætlaðar vóru at gera aðrastaðni. Á henda hátt vísir man eisini amerikanarunum, at NATO er til staðar, og tí eru russarar ikki vandamiklir, sigur Peter Viggo Jakobsen, lektari á danska verjuháskúlanum.

Umframt Danmark hava Svøríki, Noreg, Finnland, Týskland, Frakland, Ongland, Holland og Belgia sent hermenn ella yvirmenn til Grønlands.