Børnini velja eisini

- Løgtingsvalið fyllir so nógv beint nú, at børnini sjálvandi eisini verða ávirkað av tí. Soleiðis sigur Malan Hilmarsdóttir, savnsvørður á barnabókasavninum í Havn.

Ymsu valevnini, sum standa fyri vali, hava hvør sína plakat við einum vallyfti á. Síðan er tað upp til børnini, hvat av valevnunum teimum dámar best, og hvat vallyfti ljóðar mest freistandi.

Valið gongur fyri seg á sama hátt, sum tað ger hjá teimum vaksnu, við atkvøðuseðli, kliva við gardinum fyri og greiðari kunning um, hvussu tú tryggjar tær, at tín atkvøða telur við, tá talt verður saman.

Hetta er ikki fyrsta ferðin, val er á barnabókasøvnunum, men ikki eru tey nógv, sum stilla upp fleiri ferðir. Til dømis stillar ein av atkvøðuslúkunum frá seinasta vali, Pippi Smokkuleggur, ikki upp aftur í ár. 

Úrslitið av barnavalinum væntast at verða almannakunngjørt í morgin 9. desember.