H-bygningurin aftur seinkaður og dýrkar 40 milliónir

Tað koma framvegis rokningar fyri H-bygningin, og arbeiðið at gera hann lidnan, dregur út.

Einar 40 milliónir krónur mugu antin til sum eykajáttan, ella verður neyðugt at spara.

Margit Stórá, landsstýriskvinna í heilsumálum, hevur fingið at vita, at H-bygningurin kann ikki takast í nýtslu 1. januar, sum annars hevur verið ætlanin.

Tað verður ikki fyrr enn 1.apríl næsta ár, ljóðar nýggjasta metingin hjá Landsverki.

Upprunaliga skuldi H-bygningurin vera liðugur í 2019 og kosta 490 milliónir. Nú er líkt til, at bygningurin verður fimm ár seinkaður og 370 milliónir dýrari.

Stjórin á Landsverki, Sigurd Lamhauge vil ikki útgreina seinasta eykakostnaðin, av tí at málið ikki hevur verið til politiska viðgerð enn.

Sí innslag í Degi og Viku.