Liðskiparin: Góðar vónir í sólini

Sólin sær í moldavska høvuðsstaðnum, Chișinău, har liðskiparin á føroyska fótbóltslandsliðnum, Viljormur Davidsen, saman við liðfeløgunum fyrireikar seg til EM-undankappingardystin ímóti Moldova í annaðkvøld.

Vinstri bakkurin, sum ber liðskiparabandið fyri skadda miðvallaran, Hall Hansson, hevur góðar vónir, hóast nógvir av lyklaspælarunum ikki eru við í Moldova.

 - Maður kemur í mans stað. Vit hava grundarlagið upp á pláss, og nýggju spælararnir, sum koma inn og eru við nú, koma inn í prinsippini, sigur Viljormur Davidsen, sum væntar nógv av teimum lutfalsliga fesku í landsliðshópinum hesa ferð.

 - Eg rokni við, at mann gevur alt tað, mann hevur og sleppur hondbremsuni, tá mann fær kjansin, sigur liðskiparin, sum letur væl at venjingunum, sum hava verið síðstu dagarnar á Tórsvølli og í Chișinău.

Hóast liðið er nakað skert, og fyrireikingarnar hava verið raktar av kavaveðrinum í Føroyum, vil liðskiparin hava stig í annaðkvøld.

 - Mann spælir fyri at vinna og í øllum førum fyri at fáa eitt stig, men vit mugu hugsa um avrikið, tí um tað er gott, og vit spæla sum eitt lið, eru vit ringir at hava við at gera, sigur Viljormur Davidsen.