VIDEO: Sigurin súrnaði eftir tíðarskandalu

Gullheiðursmerki, men onga tíð.

Tað var úrslitið eftir 200 metur renningina á Footes Lane í St Peter Port í kvøld.

Jónas Gunnleivsson Isaksen blásti alla mótstøðu umkoll, men tíðin gekk, og eingin tíð kom, og tað sást á øllum brøgdum, at okkurt var áfatt.

Skjótt var greitt, at eingin almenn tíð var tók, og á fundi fingu rennararnir í boði at renna umaftur. Tað var ikki undirtøka fyri hesum, og tí fingu teir bert plaseringar. 

Tað sama hendi fyrr í vikuni til innleiðandi umfar á 100 metrum, tá rennararnir máttu stilla upp av nýggjum.


Stórt vónbrot

Í føroysku leguni vóru tey ikki sørt vónbrotin um støðuna, tí tey høvdu varhugan av, at Jónas kundi verið fyrsti føroyingur undir 21 sekund. So gott var avrikið hjá stjørnuskotinum. 

 - Hann (Jónas, red.) var vónbrotin av tí at byrja við, tí vit hava tippað eina sub-21 tíð á evropeiskum toppstigið, og tað trúgvi eg avgjørt, at hann gjørdi í dag eisini, segði Jógvan Kristiansson Glerfoss.

 - Vit fara at hyggja at video seinni, men tað hjálpir so lítið, tí tað verður aldrið ein góðkend tíð, so hann er eitt sindur skuffaður av tí, ja, segði ein av føroysku venjarunum.

Sí flottu 200 metrarnar hjá Jónasi Gunnleivsson Isaksen og føroysku reaktiónirnar omanfyri