Klintring skipað í menningarsamband

Nú er Klintrisamband Føroya skipað sum menningarsamband undir ÍSF.

Eftir aldarskiftið tók klintring seg upp sum áhugaítrótt í Føroyum, og nú eru nógv, sum dáma væl at klintra bæði uttandura og inni, og tí hevur klintring formliga limað seg inn í føroyska ítróttarheimin.

Í nevndini hjá felagnum sita Absalon Eysturoy, formaður, Theodor Kapnas og Rógvi Laksáfoss, sum sigur, at endamálið við nýggja menningarsambandinum er, at skipa og menna ítrottargreinina í Føroyum. Millum annað við at skipa fyri almennum kappingum, at útbúgva venjarar og intruktørar og at menna økið rundan um trygd í samband við Klintring.

 - Vit hildu, at tað var natúrligt fyri okkum at gerast partur av føroyska ítróttarpallinum, í staðin fyri at isolera seg og vera ein klubbur, sum eingin veit um, sigur Rógvi Laksáfoss.

Í løtuni er bert eitt klintrifelag í Føroyum. Havnar Klintrifelag heldur til í klintrihøllini í Bacalao á Vestaru bryggju, og Rógvi Laksáfoss vónar, at nýggj feløg fara at taka seg upp aðrastaðni í Føroyum.

 - Vit vóna, at vit í samstarvi við ÍSF kunnu hjálpa nýggjum feløgum upp at standa, sigur hann.

 - Tað hevði sjálvandi verið stuttligt, um mann kundi fingið eina kapping millum Havnar klintrifelag og Klaksvíkar klintrifelag ella Suðuroyar klintrifelag.