- Eg nái líka at anda inn eini tríggjar ferðir

Ein kann bert ímynda sær ovurstóra trýstið, sum Elias Ellefsen á Skipagøtu bar á sínum herðum, tá hann skuldi skjóta brotskast í evstu løtu ímóti Norra.

Skoraði hann, var søguligt úrslit tryggjað, misnýtti hann, var hetta enn eitt tepurt tap. 

 - Eg nái líka at anda inn tríggjar ferðir og hugsavna meg um hatta brotskastið. Tað var kanska deiligt, at eg fekk eina lítla løtu at fyrireika meg, segði Elias Ellefsen á Skipagøtu eftir dystin.

Hann skeyt uttan at hótta lágt í høgra horn, og so kundi hann venda sær á og renna teir 40 metrarnar til stóru føroysku fólkamongdina, sum tók ímóti við opnum favni.

 - Eg hugsaði faktiskt at gera eina skotfintu áðrenn, tí eg hevði skotið fyrstu ferð tvær ferðir í dystinum, men hann sá út til at standa á skeiva beininum í hinari síðuni, so eg skeyt fyrstu ferð, greiddi spælskiparin, sum eisini var dagsins spælari, frá.