SÍ knógvaði ÍF eftir javnbrótara

Roknað var við einari javnari hálvfinalu ímillum menninar hjá SÍ og ÍF, og áskoðararnir fingu eisini ein javnan og spennandi dyst í Klaksvík leygardagin.

Javnbrótari skuldi til, áðrenn sørvingar kundu fegnast um finaluplássið saman við teimum mongu áskoðarunum, sum vóru komnir úr Vágum at stuðla.

ÍF byrjaði væl, og vann fyrsta sett. Tað kom óvart á SÍ, segði Silas Poulsen, men sørvingar reistu seg skjótt aftur og vunnu tvey tey næstu settini. ÍF javnaði til 2-2, men í javnbrótaranum vóru sørvingar kaldari. 

SÍ skal spæla ímóti Mjølni í steypafinaluni.

SÍ-ÍF 3-2 (18-25, 25-16, 25-20, 22-25, 15-10)