Nú er barnagarður á Húsum

Mánadagin sleppa børn í Kalsoynni fyri fyrstu ferð í barnagarð í oynni. Tá letur barnagarðurin, vøggustovan og frítíðarskúlin á Húsum upp. Hetta er nakað, sum veruliga ger gerandisdagin lættari.

Emma Lý gleðir seg nógv til mánadagin. Og foreldrini, Jóhanna Maria Isaksen og Hans Arthur Leivsgarð gleða seg eisini til at sleppa at arbeiða sum vanligt. Tey arbeiða bæði á Kalsoynni - á smoltstøðini hjá Bakkafrosti.