Skálagarður virkar framvegis ikki

Skálagarður í Klaksvík er ein bú-, umlættingar- og endurmenningardepil í Klaksvík, sum byrjaði sítt virksemi í mars í fjør. Men hann er ongantíð komin at virka, sum hann skal.

Trupulleikar vóru at fáa starvsfólk, og ósemjur í leiðsluni á stovninum og Almannaverkinum høvdu fyrr í ár við sær, at stjórin mátti til hús.

Pláss er fyri fimtan brúkarum á stovninum, men í løtuni er bara trý eftir. Tann fjórði varð sendur heim herfyri, eftir øllum at døma av misgáum.

At røkta hesi trý fólk eru tólv starvsfólk og nakrir avloysarar.

Edvard Heen, stjóri á Almannaverkinum, segði í summar, at trupulleikarnir skuldu vera loystir í august.