Skerdur musikkskúli í Havn

Høvuðshurðin hevur ikki virkað síðan 2020, skiferklædningurin brotnar, tað lekur í eyri og seyri, instrumentini líða undir vánaligum inniklima og tað larmar so illa millum unditrvísingarhølini, at tey ikki kunnu brúkast til fulnar.

Tórshavnar Musikkskúli fekk annars ein spildurnýggjan bygning handaðan í 2019, men líka frá byrjan hava trupulleikar verið við bygninginum.

Eftir at hava pjøssað upp á hann síðan 2019, so avgjørdi kommunan at fara í gerðarættin við ráðgevunum í 2022. Tað tók sína tíð at velja sýnsmenn og hvørjar spurningar hesir sýnsmenn skuldu svara. Nú er semja fingin í lag um hesar spurningarnar, sýnsmenn valdir og bíðað verður nú eftir, at hetta arbeiði byrjar.