Eyðun Klakstein: Vónar, at Montenegro knarrar um veður, vind og vøll

Føroyar fara eftir øllum trimum stigunum ímóti Montenegro í annaðkvøld. Tað hevur landsliðsvenjarin, Eyðun Klakstein, gjørt púra greitt í fyrireikingunum til HM-undankappingardystin á Tórsvølli.

Veðrið, sum fyrr í vikuni forðaði fleiri av fótbóltsútisetunum at flúgva heim til ásettu tíðina, verður kanska heldur ikki so gott, tá liðini fara á vøllin í morgin, og landsliðsvenjarin vónar, at tað kann hjálpa føroyingunum til sigurs.

 - Vit eru nokkso vanir við, at umstøðurnar kunnu vera skiftandi, og verður eitt sindur av regni, er tað eingin trupulleiki fyri okkum. Vit vóna bara, at mótstøðuliðið hevur tað eitt sindur truplari við tí og fer at knarra eitt sindur um veður, vind og vøll, segði Eyðun Klakstein.

Liðið er sett, segði venjarin, sum kortini ikki vildi avdúka, júst hvør verður millum fyrstu 11 hjá Føroyum. Hann segði kortini, at liðskiparin, Hallur Hansson, ikki er førur fyri at byrja inni ímóti Montenegro. Hann kann kortini verða skiftur inn, um tað verður neyðugt.

LES EISINI: Vit gita: Hetta verður liðið í annaðkvøld

Verjuspælið fyrst og fremst

Síðan Eyðun Klakstein og Atli Gregersen fingu ábyrgdina av landsliðnum, hevur føroyska liðið verið ringt at skora ímóti. Í hesi undankappingini eru bert fimm mál skotin ímóti  Føroyum í fimm dystum, og tað er sera ósannlíkt, at føroyingarnir ikki byrja í eini 5-4-1 uppstilling.

Tí stúrir Eyðun Klakstein ikki fyri, at nýggi venjarin hjá Montenegro, Mirko Vucinic, sum stendur á odda fyri fyrstu ferð í Føroyum, hevur funnið upp á okkurt nýtt.

 - Vit hava fyrireika okkum so væl, vit kunna, og eg føli, at okkara verjuspæl kann taka ímóti øllum tí, sum teir koma við. Eg havi eina kenslu av, at halda vit nullið, so vinna vit dystin, segði Eyðun Klakstein, sum fegin vil koma upp á níggju stig, sum er tað besta, sum føroysku menninir hava klárað higartil.