Fleyr vardi oddasessin við greiðum sigri á TB

Høllin á Hálsi (Hotel Djurhuus-deildin)

Fleyr - TB, 3-0 (25-14, 25-20, 25-18)

Fleyr vardi oddasessin í bestu flogbóltsdeildini við kvinnum við tryggum 3-0 sigri í oddadystinum ímóti TB.

Havnarliðið, sum ætlar sær greipuna í ár, hóast helmingurin av liðnum er útskiftur í mun til í fjør, kom betur frá byrjan og vann heili 25-14 í fyrsta setti. Servurnar riggaði sera væl hjá Fleyr, helt Kristina Østerø Knudsen.

Tb var betur við í 2. setti, men eftir at hava verið frammanfyri 10-9, mátti útiliðið síggja Fleyr yvirhála og vinna 25-20. Í 3. setti var ongin bøn. Fleyr var frammanfyri mestsum frá byrjan, og vann 25-18.

Hóast TB mátti suður aftur uttan sett, ætla tær sær at kappast um topp-plássini í deildini, sigur Ranja Magnussen. Nýggjur ukrainskur venjari er komin til landið, og hann fer beint í gongd við at venja TB-kvinnurnar.

Fleyr er fremst við 9 stigum frammanfyri SÍ, sum smurdi Drátt av hetta vikuskiftið. TB datt aftur á 3. plássi.