Mjølnir einaráðandi undan FM-finalunum

Mjølnir taptu fyri Fleyr í ársins fyrsta dysti, men síðan hava norðingarnir gjørt slætt borð í bestu flogbóltsdeildini við kvinnum.

Heimaliðið í badmintonhøllini í Klaksvík hevði heldur ikki stórvegis trupulleikar av TB og vann sannførandi 3-0 sigur.

Útiliðið bjóðaði kortini av í 2. setti, tá TB spældi seg til tveir settbóltar, men Mjølnir yvirlivdi og vann 30-28.

So var einki eftir í tanganum hjá TB, og heimaliðið vann sannførandi í 3. setti og dystin, sum vann hin 13. landskappingarsigurin á rað.

Mótstøðuliðið hjá kvinnunum úr Mjølni í finalunum um FM-heitið verður eins og hjá monnunum SÍ. Liðini hittast í eini aðalroynd mikukvøld.