Bjarki og Mia føroyameistarar í amboðsfimleiki

Bjarki Johannesen og Mia Højgaard úr Havnar Fimleikafelag vunnu føroyameistaraheitið í amboðsfimleiki, sum var í Bylgjuni í Runavík um vikuskiftið.

Hjá monnum var Bjarki Johannesen nógv bestur. Hann vann gólv, ringar, lop, barr og rekk og var næstbestur í beinsveiggi. Tað gav íðkaranum úr HF 68.050 stig samanlagt frammanfyri  Ara Poulsen úr Støkk (59.000) og Bjarta Skylv Hansen úr HF (53.400).

Kappingin um samanlagda sigurin hjá kvinnum var munandi harðari. Har vann Marin Danielsen lop og gólv, Ronja Johannesen vann á bitanum og Mia Højgaard var best á barr. Allar tríggjar eru í Havnar Fimleikafelag.

Tað var kortini Mia Højgaard, sum fór avstað við all around-gullinum. Hon fekk 44,249 stig frammanfyri Marin Danielsen (42,049) og Ronju Johannesen (40.082).

Hjá kvinnunglingum vann Oddvør Alberta Kimsdóttir úr HF, meðan Ási Arnoldson úr Støkk var bestur hjá mansunglingum.