Avroðið endar í skeivum ovni

Í dag varð flett á Skemmugarði á Sandi. Har verður nógv av seyðinum gagnnýttur, men eftirspurningurin eftir avroði er ikki tann sami, sum hann einaferð var.

– Eftirspurningurin kundi verið størri, heldur Pauli Sandoy, bóndi á Skemmugarði.

Tá flett verður kring landið, endar ein partur av avroðnum sum burturkast, sum verður brent hjá IRF. Sambært Paula Sandoy fer alt ov nógv gott tilfeingi fyri skeytið.

Tað vil IRF broyta. Við heimasíðuni avroð.fo skal tað vera lættari hjá fólki at bíleggja avroð beinleiðis frá bóndum. Samstundis fáa bøndurnir betri møguleika at vita frammanundan, hvussu nógv avroð teir skulu taka frá.

Pauli Sandoy fegnast um átakið, men enn bíðar hann eftir, at fleiri bíleggingar koma inn.