Sinnað at ganga Føroyum á møti

Jacob Vestergaard, landsstýrismaður í fiskivinnumálum, tekur væl ímóti útsøgnini hjá norska fiskimálaráðharranum. 

Norski fiskimálaráðharran, Elisabeth Aspaker, vónar at finna eina semju í makrel- og sildatrætuni áðrenn jól. Tað sigur hon við norsku tíðindastovuna NTB, eftir fund við ES-fiskivinnukommiserin Mariu Damanaki mánadagin. 

Elisabeth Aspaker sigur, at makrelmálið hevur hægstu raðfesting, og at samráðingarfólkini frá ymisku strandalondunum fara komandi vikurnar at royna at finna eitt samráðingarúrslit, sum gjarna fyriliggur áðrenn jól.

Noreg hevur, eins og ES, sett handilsforboð mót føroyskum fiskavørum. 

Jacob Vestergaard, landsstýrismaður í fiskivinnumálum, fegnast útsøgnina, tí Noregi og ES vita neyvt, hvat føroyska makrel- og sildakravið er. Tí ber útsøgnin hjá norska fiskimálaráðharranum boð um, at Noregi og ES eru sinnað at ganga Føroyum á møti í makrel- og sildatrætuni.