Kanna aðra havn í Íslandi til Norrønu

Í Íslandi skrivar blaðið Visir, at Smyril Line er farið at kanna aðrar havnarmøguleikar á Eysturlandinum til NORRØNU enn Seydisfjørð. Tað er serliga um veturin, at brúk er fyri at hava annan møguleika enn Seydisfjørð.

Ikki tí at havnaviðurskiftini aðrastaðni á Eysturlandinum eru betri, men tí at torført kann vera at koyra til og av Seydisfirði, serliga um veturin, tá kavi legst, og stóru trailararnir við tungum farmi skulu koyra fleiri hundrað metrar upp á Fjarðarheiðina fyri at koma víðari.

Visir skrivar, at Eskifjørður og Reyði-fjørður eru uppá tal, sum alternativ vetrarhavn hjá Norrønu.

Rúni V. Poulsen, stjóri á Smyril Line, váttar, at Smyril Line kannar málið, tí flutningurin til og frá Seydisfirði er so trupul um veturin.