Vekja áhuga fyri føroyska landgrunninum

Føroyar eru aftur av álvara farnar at vekja áhuga fyri føroyska landgrunninum, sigur Jacob Vestergaard, landsstýrismaður,

Hann hevur júst verið í Noregi og Skotlandi í hesum ørindum.

Jarðfeingi hevur í nógv ár granskað og greinað umstøðurnar á føroyska havbotninum, og nú verður føroyski landgrunnurin aftur marknaðarførdur fyri altjóða oljufeløgum.

Talan er ikki bara um olju, men um onnur ráevni eisini.

Jacob Vestergaard

700.000 kr. á fíggjarlógini

Í ár eru 700.000 kr. í fíggjarlógini til oljuleiting.

Jarðfeingi hevur givið út frágreiðing um mineral á havbotninum á føroyska landgrunninum. 

Her er talan um millum annað sjáldsom jarðsløg og onnur kritisk ráevni, sum eru avgerandi fyri at gera hátøkni, eisini tøkni, sum verður brúkt í grøna orkuskiftinum.

Serliga Ægisryggurin norðan fyri Føroyar tykist vera áhugaverdur. Men har er djúpt, tveir og hálvur kilometrar.

Tað er tí stór tøknilig avbjóðing at fáa aftur í hesum ráevnum.

- Óvist er, nær hetta gerst tøkniliga møguligt, og nær tað fæst at hanga fíggjarliga saman, sigur Jacob Vestergaard.