Hevur ikki altíð álit á Havstovuni

Landsstýrismaðurin í fiskivinnumálum, Jacob Vestergaard, hevur ikki altíð álit á tí arbeiði, sum Havstovan ger og teimum tilráðingum, sum Havstovan letur landsstýrismanninum.

Tað segði hann, tá løgtingið fyrrapartin hevði fyrstu viðgerð av fiskidøgunum fyri næsta fiskiár.

Tað var Páll á Reynatúgvu, framsøgumaður fyri Tjóðveldi, sum undir orðaskiftinum spurdi, hvørja støðu landsstýrismaðurin hevur til serkunnleikan á Havstovuni.

Havstovan hevur í sínum tilmæli til landsstýrismannin mælt til at skerja fiskidagarnar munandi næsta fiskiár, tí botnfiskastovnurin undir Føroyum er so illa fyri, sambært Havstovuni.

Men tilmælið frá Havstovuni rínir ikki við landsstýrismannin, sum mælir til óbroytt fiskidagatal næsta fiskiár.