Spardar oljuútreiðslur eiga at fara til umvæling

Fallandi oljuprísurin og harvið lækkandi oljurokningin til Strandferðsluna, skal koma Smyrli til góðar.

Leiðslan á Strandferðsluni hevur roknað seg fram til, at við verandi oljuprísum kann stovnurin spara umleið 4,7 milliónir krónur í olju næsta ár.

Tey boðini eru farin víðari til Vinnumálaráðið, sum nú biður løgtingið um vælvild.

- Vinnumálaráðið skal staðiliga heita á Fíggjarnevndina um ikki at skerja játtanina til Strandferðsluna, skrivar ráðið til løgtingið.

Í staðin fyri at skerja játtanina til Strandferðsluna við teimum 4,7 milliónunum, sum stovnurin væntandi fer at spara á olju-kontu'ni, mælir Vinnumálaráðið til at lata pengarnar til Smyril.

Ítøkiliga til at seta eina eyka manning á skipið fyri á tann hátt at taka hædd fyri strangu krøvunum um hvílitíðir. Og so skal viðlíkahaldið gerast á Smyril.

Hoyr samrøðu við Hilmar Eliasen, stjóra á Strandferðsluni, í útvarpstíðindunum.