Bárður Nielsen: Sambandsflokkurin farin av kós

Sambandsflokkurin er farin av kós og má finna aftur til grundvirðini.

Tað heldur Bárður á Steig Nielsen, løgtingsmaður fyri Sambandsflokkin.

Sambandsflokkurin stendur seg illa í seinastu veljarakanningunum og missir undirtøku millum veljararnar.

Ein orsøk er, sambært Bárði á Steig Nielsen, at Sambandsflokkurin hevur latið ov nógv vald upp í hendurnar á øðrum samgonguflokkum.

Sambandsflokkurin hevur landsfund nú um vikuskifti. Greitt er longu nú, at Kaj Leo Holm Johannesen heldur fram sum formaður í Sambandsflokkinum, tí eingin hevur stillað upp ímóti sitandi formanni.

Greitt er eisini, at Johan Dahl heldur ikki fram sum næstformaður í Sambandsflokkinum. Hann leggur frá sær og fer úr poltikki eftir løgtingsvalið, sum skal vera í seinsta lagi tann 29. oktober.