Gransking- Vit mugu fáa tíðarhóskandi vitanarstørv

Flokkarnir, sum stilla upp til løgtingsvalið, leggja alt ov lítlan dent á gransking.

Tað heldur Granskingarráðið, sum hevur lisið valskráirnar hjá flokkunum. Niðurstøðan er, at tað sum verður skrivað um gransking er hvørki serliga umfatandi ella ítøkiligt.
Tað heldur Guðrið Andorsdóttir, sum er forkvinna í Granskingarnevndini.

Granskingarráðið lat á vári 2013 landsstýrinum “Tilmæli - ætlan um verksetan og fokusøki” av yvirskipaða granskingarpolitikkinum Vitan & Vøkstur, sum varð samtyktur av Vísindaráðnum á fundi 28. januar 2011. Hann skuldi vera galdandi fyri tíðarskeiðið 2011-2015. Tilmælið um verksetan var úrslit av drúgvum arbeiði, har granskingarstovnar og granskarar vóru við í allari tilgongdini.

Í tilmælinum varð mælt til at raðfesta gransking á hesum fokusøkjum:

• Hvussu fyrireika vit okkum at standa ímóti avleiðingum av veðurlagsbroytingum?

• Hvaðani fáa vit orku í framtíðini?

• Hvussu umsita og gagnnýta vit best tilfeingið í havinum?

• Hvussu gagnnýta og menna vit okkara tilfeingi til nýggjar og fleiri vinnugreinar?

• Hvussu finna og gagnnýta vit vitan um heilsu hjá menniskjanum?

• Hvussu búgva vit fólkið til framtíðar avbjóðingar?