25 minuttir við Bárði á Steig Nielsen

Bárður á Steig Nielsen helt sína fyrstu røðu sum sambandsformaður á landsfundi floksins í gjár.

Útvarpið hevur boðið honum í útvarpsstovuna, nú Sambandsflokkurin er farin undir sjálvrannsakan.

Eitt bakkast fyri flokkin

Sambandsformaðurin heldur, at samgongusamstarvið við Fólkaflokkin og Miðflokkin fór illa við Sambandsflokkinum.

Tað vísti løgtingsvalið í fjør greitt.

- Týdningurin av ríkisfelagsskapinum kámaðist til tíðir, og vit mugu staðfesta, at úrslitið av at fara í samgongu við ein ultrahøgravendan flokk var vánaligt, hóast vit fingu rættiliga nógv burtur úr sosialu virðunum, sigur hann.

Sambandsflokkurin er nú farin undir sjálvrannsakan. Ein av meginuppgávunum er at fáa samband aftur við baklandið. Floksleiðslan hevur ikki í nóg stóran mun havt stundir til tað, men nú flokkurin er í andstøðu, skal baklandið framat.

- Vit mugu ásanna, at tað hava vit ikki dugað nóg væl, heldur sambandsformaðurin.

Sum formaður í fíggjarnevndini hjá løgtinginum hevði Bárður á Steig Nielsen sjálvur ein virknan lut í politikkinum, sum varð førdur farna valskeið.

Skal hava veljarar aftur

Sambandsflokkurin misti nógvar atkvøður til Javnaðarflokkin á løgtingsvalinum seinast, tí fleiri sambandsfólk mettu, at Sambandsflokkin lat seg stýra av Fólkaflokkinum.

Men Sambandsflokkurin var meira sosialur enn fólk góvu sær far um, heldur Bárður Nielsen.

- Um veljararnir høvdu lurtað eftir tí, vit søgdu, so skilji eg ikki, at teir valdu Javnaðarflokkin, sigur hann.