Fjarhitafelagið kundi ikki vátta grøna orku

Tað hevur ikki eydnast Fjarhitafelagnum at sannføra Rigmor Dam, landsstýriskvinnu, og ráðgevum hennara um, at Fjarhitafelagið letur grøna orku.

Samgonguskjalið bindur landsstýrið til at hita nýggjar almennar bygningar við grønari orku.

Jarðhiti er grøn orka. Tí er jarðhitin valdur, hóast hann kostar 13,4 mió. kr., og fjarhitin kostar einki í íløgum.

Rigmor Dam hevur heldur onga vissu fingið fyri, at Glasir kann fáa fjarhita longu næsta ár.

Landsverk, sum er byggiharri, hevur saman við Boga Bech Jensen, professara í orkuverkfrøði, rektara á Glasi og formanni í bygginevndini, mælt landsstýriskvinnuni til at brúka jarðhita.

Tað sama ger Umhvørvisstovan í einum uppriti.