Ávaraðu um nevndarsamsýningina

Bæði løgtingslimir og fíggjarnevndin ávaraðu landsstýriskvinnuna, men landsstýriskvinnan sópaði ávaringarnar av borðinum.

Tað sigur Bárður Nielsen, løgtingslimur og formaður í Sambandsflokkinum. Bárður Nielsen er eisini næstformaður í Fíggjarnevndini.

Landsbankanevndin hevur ásett sær sjálvari samsýning, sum hvørki Lønardeildin ella landsstýriskvinnan í fíggjarmálum eru samd í.

Men Kristina Háfoss sigur, at hon fær onki gjørt við samsýningarnar hjá landsbankanevndini.

Kristina Háfoss eigur at seta hart ímóti hørðum og lækka samsýningina hjá nevndini, sigur Bárður Nielsen.

Tá landsstýriskvinnan kundi koyra nevndina í Fíggingargrunninum til hús, so kann hon eisini gera tað sama við landsbankanevndina, heldur Bárður Nielsen.

Segði Bárður Nielsen, løgtingslimur og formaður í Sambandsflokkinum, við Óluvu Zachariasen.

Formaðurin í Landsbankanum fær 16.000 krónur um mánaðin í nevndarsamsýning. Næstformaðurin fær 12.000 krónur og nevndarlimir fáa 8.000 krónur.