Tunnilsmunni verður ikki fluttur

Stjórin fyri P/F Eystur- og Sandoyartunlar er avgjørdur. Tunnilsmunnin verður ikki fluttur burtur frá havnalagnum á Gomlurætt, soleiðis sum eitt samt Tórshavnar Býráð biður um.

-Nei, áheitanin frá býráðnum fær okkum ikki at broyta meining, sigur Teitur Samuelsen.

Tórshavnar Kommunan hevur víst á, at tað fer at órógva alt ov nógv, um tunnilsmunnin frá Sandoyartunlinum verður á sjálvum økinum á Gomlurætt. Umsitingin hjá kommununi minnir á, at talan er um einasta havnaøki í kommununi, sum vendir vestureftir móti Koltri og Hesti - tí verður Gomlurætt framvegis eitt knútapunkt, eisini eftir at koyrandi verður í Sandoynna. Eisini er økið á Gomlurætt upplagt at nýta til vinnuligt virksemi, tað veri seg ferðavinnu ella aling.

Á býráðsfundi 28. september varð einmælt samtykt, at býráðið ikki tekur undir við verandi linjuføring á Gomlurætt og mælir landsins myndugleikum til at taka upp nýggjar samráðingar við partafelagið Eysturoyar- og Sandoyartunnilin.
Einmælta býráðssamtyktin á Vaglinum í Havn fær tó ikki Teit Samuelsen at broyta meining.

Tunnilsstjórin vísir aftur, at ein tunnilsmunni niðri á Gomlurætt ávirkar verandi virksemi. Eftir stendur so spurningurin, hvat nýtt virksemi møguliga kann hugsast at vera lagt á Gomlurætt, men verandi virksemi kann so halda fram, staðfestir Teitur Samuelsen.

Spurningurin, hvat grótið frá Sandoyartunlinum skal brúkast til, er framvegis ikki loystur. Umsitingin hjá Tórshavnar Kommunu hevur skotið upp at brúka grótið úr undirsjóvartunlinum til eitt heilt nýtt bústaðarøki á Velbastað, í lendinum við bryggjaríið Okkara. Málið um grótið var á skránni fyri býráðsfundin 28.september, men varð tikið av skránni. Frammanundan hevur partafelagið Eystur- og Sandoyartunlar gjørt avtalu við ein bónda á Velbastað um at brúka grótið til at planera eitt nýtt dyrkilendi sunnanfyri bygdina. Tað váttar Teitur Samuelsen, stjóri í partafelagnum Eystur- og Sandoyartunlar, sum tó leggur afturat, at enn eru øll loyvi ikki fingin uppá pláss.