Sjey milliónir røkka ikki langt

- Vit koma ikki langt fyri sjey milliónir. Tað vita øll, sigur Ewald Kjølbro, stjóri á Landsverki.

Skal tunnilsliðið hjá Landsverki til arbeiðis næsta ár, so skulu tvífalt so nógvir pengar setast av.

Mugu keypa útgerð

Henrik Old, landsstýrismaður í samferðslumálum, vil hava Landsverk at skipa eitt tunnilslið, sum skal bora tunlar til smærru bygdirnar so sum Fámjin, til Dals, Tjørnuvíkar og til Gjáar.

Landsstýrismaðurin ætlar, at tríggir menn skulu bora tunnlarnar í vanligari arbeiðstíð, og so má tað taka ta tíð, tað tekur.

Men sjey milliónir krónur muna ikki nógv.

Landsverk seldi sína tunnilsútgerð, tá Gásadalstunnilin var boraður. Tunnilstoymið hjá Landsverki var tá strikað. 

Nú tunnilstoymið skal endurreisast, má tunnilsútgerð keypast inn.

- Skulu vit keypa nýggja útgerð, so kostar tað umleið 30 milliónir krónur. Skulu vit keypa rímiliga góða, brúkta útgerð, so kostar tað millum 10 og 15 milliónir, sigur Ewald Kjølbro, stjóri á Landsverki.