Tingið skal taka støðu

Løgtingsumsitingin mælir til at burturvísa uppskotinum um stjórnarskipan. Løgfrøðingar hjá løgtinginum siga, at uppskotið ber brá av, at tað ikki er gjøgnumarbeitt, og at tað ikki er í samsvar við tingskipanina. 

SÍ EISINI: Mæla til at burturvísa stjórnarskipanini

Men Páll á Reynatúgvu, løgtingsformaður, sigur, at formannskapurin fer ikki at burturvísa uppskotið.

Tingið skal gera av, um málið skal vinna frama í skipanini ella ikki, sigur hann.

- Man kann siga, hetta er býtt upp í tríggjar lutir, um man so má siga. Tað er arbeiðið hjá umsitingini, og so er tað arbeiðið hjá formansskapinum, og so er tað støðutakanin hjá løgtinginum. Niðurstøðan hjá formansskapinum er, at formansskapurin tekur undir við uppritinum frá umsitingini í tinginum, og mælir tinginum at taka støðu í málinum. 

Samsvarar ikki við verandi tingskipan

Uppskotið um stjórnarskipan er brot á tingsskipanina, og sambært tingskipanini skal løgtingsformaðurin mæla til at burturvísa uppskotið eftir at hava fingið samtykkið frá formansskapinum. 

- Vit taka støði í uppritinum frá umsitingini, men vit meta, at tað er rætt, at tað er tingið sjálvt, sum sleppur at gera av, um tað skal vera eitt nei ella eitt ja. Soleiðis sigur Páll á Reynatúgvu, ið kallar orðingina meira neutrala enn umsitingin mælir til. 

Les uppritið frá umsitingini her.