Ikki loyvt at koyra fólk út

Tað er ikki loyvt at koyra fólk út úr leiguíbúðum í eina mánað um árið - og tað er uttan mun til um tað er lestraríbúð ella næmingaheim, sigur Andrass Holm Arge, formaður í leigunevndini.

Kortini hevur skúlaheimið í Marknagili havt hesa siðvenju í nógv ár. Her skulu næmingarnir út bæði í summarfrítíðini og í vikuskiftinum.

Orsøkin kann vera at leigulógin er nýggj, og tí tekur tað tíð at broyta siðvenjur, sigur Andrass Holm Arge, formaður í leigunevndini.

Leigulógin er í løtini til hoyringar, og tað er upp til landsstýriskvinnuna í almannamálum, um hon vil gera undantøk í lógini, so tað verður loyvt at koyra fólk út í summarfrítíðini, sigur Andrass Holm Arge.