Nógv ivamál um bygningin á Eirargarði

Tað verður ikki bara sum at siga tað at lata Húsalánsgrunninum Eirargarð 2 til lestraríbúðir.

Umhvørvisstovan heldur tað ikki vera ráðiligt at seta verandi tinglýsingar- og matrikkullóggávu úr gildi serliga fyri ein bygning.

Landssjúkrahúsið vil hava, at sjúkraflutningstænastan sleppur at vera verandi í niðastu hæddini í Eirargarði 2.

Og brúk verður fyri nógv fleiri parkeringsplássum, skulu 43 til 55 lestrarbýli gerast í Eirargarði.

Húsalánsgrunnurin spyr, um Bústaðir skulu gjalda, um broytingar ella betringar skulu gerast í niðastu hæddini.

Og um Landssjúkrahúsið skal rinda Húsalánsgrunninum leigu, tá Húsalánsgrunnurin fær ræðið á Eiragarði 2.

Frávik frá matrikullógini

Landsverk sigur í sínum hoyringarsvari, at sum uppskotið er orðað, er talan um beinleiðis frávik frá matrikullógini. 

Hetta hevur við sær møguligan iva, um sundurbýting ber til og, um til ber at lýsa veð í bygninginum. 

Landsverk ivast eisini í, um ræði er rætta orðið at brúka.

Landsverk vísir á onnur ivamál í lógaruppskotinum.

Landsverk og Tórshavnar kommunu hava fund hósdagin í næstu viku um lestrarbústaðir í kampusøkinum og í Eirarsgarði 2 við atliti at byggisamtyktini, sum neyðugt er at broyta, fyri at fremja hesa verkætlan og aðrar, sigur Landsverk.