- Tíðindi, mentan og ítróttur
Radarin
![](https://kvf.fo/sites/default/files/styles/podcastmyndir/public/radarin_puntur.png?itok=UKzRd4Rd)
Bæði á privatum og almennum arbeiðsplássum eru alsamt fleiri fólk eldri enn 67 ár virkin á arbeiðsmarknaðinum.
Fyri 10 árum síðan, í 2007, vóru 697 fólk eldri enn 67 ár virkin á arbeiðsmarknaðinum.
Nú eru sløk 1200 fólk eldri enn 67 ár á arbeiðsmarknaðinum.
Meira enn triði hvør fólkapensjónistur er framvegis til arbeiðis.
- Og tað talið fer áhaldandi at vaksa, heldur Hans Pauli Strøm, sum er sosiologur á Hagstovuni.
Fyri 13 árum síðan tjenti aldursbólkurin 67-74 ár slakar 4000 krónur um mánaðin.
Nú tjenar sami aldursbólkur slakar 7000 krónur um mánaðin.
Kenna ikki orsøkina
Í Landsfelag Pensjónista kenna tey ikki reiðiliga orsøkina, ásannar formaðurin Arne Thorsteinsson.
- Nei, tað vita vit ikki. Neyvari kanningar mugu gerast fyri at svara tí. Men sjálvandi, so kunnu vit hugsa okkum nakrar orsøkir, sigur hann.
Og tað er júst tað, hann hevur gjørt.
- Ein orsøk kann vera, at heilsan hjá fólki, eisini pensjónistum, verður betri og betri. Ein onnur er, at pensjónistar arbeiða av neyð, tí pensjónin er so vánalig. Ein orsøk kann eisini vera, at arbeiðsmøguleikarnir eru batnaðir, sigur hann.
Markið var 67
Táverandi landsstýrismaður í fíggjarmálum, Magni Laksáfoss, broytti reglugerðina í 2007 so, at fólk sum starvast hjá tí almenna kundu halda fram í starvinum til tey eru 70 ár.
Tey noyddust ikki longur frá, tá tey fyltu 67.
Tað var í stóra arbeiðsloysinum í kreppuárunum í 90unum, at almenni fráfaringaraldurin fór niður í 67 ár.
Sum partur av krepputitøkunum kom landsstýrið við reglugerð um uppsøgn av almennum starvsfólkum vegna aldur. Markið var 67 ár.
Sjálvt um fráfaringaraldurin fór upp í 70 ár í 2007, so hava starvsfólk hjá tí almenna framvegis rætt at fara frá fyri aldur, tá tey eru 67 ár.
Tey, sum halda fram at arbeiða til tey eru 70 ár varðveita eisini grundupphæddina í fólkapensjónini.
Men interkommunalir felagsskapir sum SEV og IRF hava sínar egnu reglur um fráfaringaraldur.
Flestu kommunurnar brúka 67 sum fráfaringaraldur, ella hava tey ongan fráfaringarpolitikk.
Tórshavnar kommuna, Klaksvíkar kommuna og Runavíkar kommunu brúka 70 ára fráfaringaraldur.
So reglurnar eru ymiskar.
Gott fyri búskapin
At fleiri og fleiri fólk eldri enn 67 ár eru til arbeiðis, eru góð tíðindi hjá Búskaparráðnum.
Vaksandi talið av eldri fer at seta samfelagið undir trýst.
Men tað, at fólk eru drúgvari á arbeiðsmarknaðinum nú enn fyrr, ber við sær, at trýstið verður minni, enn roknað annars var við, heldur Ester Hansen, sum er limur í Búskaparráðnum.
Luttakarar í sendingini: Jón Eliassen, tekniskur ráðgevi hjá KJ Hydraulik, Arne Thorsteinsson, formaður í Landsfelag Pensjónista, Hans Pauli Strøm, sosiologur á Hagstovuni, Bjørg Jacobsen, etnologur, og Ester Hansen, limur í Búskaparráðnum.
![](https://kvf.fo/sites/default/files/styles/news_xtra_xtra_large_2/public/radarin_puntur.png?itok=bIPDwSj9)