- Politisk raðfesting um dálking hjá skipum má til

Føroyski skipaflotin megnar ikki, sum er, at lúka krøvini, sum sjófartsfelagskapurin hjá ST hevur boðað frá um minni dálkandi útlát. 

Umhvørvisnevndin hjá IMO, sum er sjófartsfelagskapurin hjá ST, fer at hava fund í London í komandi viku. Á fundinum skal greiðast frá, hvussu skipaflotin kring heimin kann nútímansgerast, so útlátið av dálkandi evnum kann minka.

M.a. mælir Japan til, at útlátið av vakstrarhúsgassi skal minka við 40% til 2030 samanborið við útlátið í 2008. Men Danmark, Belgia, Spania, Ný Sæland og Marshall-oyggjarnar mæla til, at útlátið skal minka við 70% til 2030, og at eingin dálking skal vera frá skipum í 2050. 

Ógjørlig mál

Men vit fara ikki at røkka tí málinum, sigur Suni Petersen, deildarleiðari á Umhvørvisstovuni. 

Slík viðurskifti taka vanliga langa tíð at broyta, og tí væntar Suni Petersen ikki, at Føroyar klára at liva upp til tey krøvini longu í 2030. 

Eingin bindandi krøv

Spurningurin er tí, hvørjar avleiðingar tað kann fáa fyri Føroyar, um slík krøv vera sett til dálkandi evni á skipum, og vit ikki megna at liva upp til ásettu treytirnar. 

Í dag eru eingi bindandi krøv um útlát av vakstrarhúsgassi hjá skipum. Og tað er ikki heilt nøktandi, heldur Suni Petersen. 

Hann sigur tó, at um nøkur ár verður tøknin vantandi ment, og tískil fáa skipini betri fyritreytir at lúka komandi krøvum um at gerast grønari. 

Men politisk raðfesting er sera týdningarmikil, tí uttan krøv hendir einki.