Oljudálkingin á Havnarvág: Tað mesta av oljuni sogin upp

Hósdagin seinnnapart fekk Tórshavnar Sløkkilið fráboðan um oljudálking á Havnarvág. Á Kongabrúnni, við Bursatanga og út til molan. 

"Vit fingu fráboðanina ímeðan vit tóku okkum av øllum vatnskaðunum, sum vóru komnir av regninum og áarførinum," sigur Heini Østerø, sløkkiliðsstjóri hjá Tórshavnar Sløkkiliði.

Teir byrjaðu beinaveg at leggja girðingar út, sum súgva oljuna. Tá leygardagurin var av, høvdu teir fingið yvir 2000 litrar av olju upp. "So talan er um eina stóra mongd av olju. Tað átti onkur at lagt merki til, at tey mangla yvir 2000 litrar av olju." 

Sløkkiliðið hevur verið í samband við oljufeløgini, tí um onkur setur seg í samband við oljufelagið, tí tey brádliga mangla 2000 litrar av olju, so kunnu tey boða sløkkiliðnum frá.

Sløkkiliðið hevur ikki vitað hvar oljan kom frá, men eftir tíðindini á døgurði, funnu tey útav tí. Tað fekk Heini Østerø boð um ímeðan Kringvarpið gjørdi samrøðu við hann. 

Heini Østerø kann ikki staðfesta hvør orsøkin er í dag, men sløkkiliðið fer at kanna málið nærri.