Tórshavnar kommuna vil langtíðarútleiga grundøki

Tórshavnar Kommuna søkir nú um at fáa loyvi at leiga fyritøkum grundøki at byggja á, skrivar Sosialurin.

Tað merkir, at fyritøkur, sum ætla at byggja íbúðir, kunnu sleppa undan at keypa grundøki í Tórshavnar Kommunu. Heldur kunnu fyritøkurnar langtíðarleiga grundøkið.

Hetta kann geva fleiri borgarum tak yvir høvdið, sigur borgarstjórin, Annika Olsen.

Prísurin á grundøki er ein stór forðing, tá privatar fyritøkur skulu byggja íbúðir at leiga út, sigur borgarstjórin í Havn.

Kommunan hevur søkt Heilsu- og Innlendismálaráðið um at taka stig til at broyta lóggávuna soleiðis at kommunur kunnu leiga grundøki út heldur enn at selja. 

Annika Olsen væntar, at hóast byggilendið verður útleigað heldur enn selt, so verður hetta ein fíggjarligur vinningur fyri kommununa.

Tórshavnar Kommuna sigur í umbønini til Heilsu- og Innlendismálaráðið, at fólkatalið í kommununi er vaksið við yvir túsund fólkum síðan 1. juli 2015. Og bara seinasta árið er fólkatalið vaksið við 449 borgarum.