Vørðustíggjur og Sandoy Seafood høvdu onga avtalu

Avtalan við Sandoy Seafood var so mikið órímilig, at hon gav onga meining fyri reiðaríið Vørðustíggj.

- Tí var eingin annar møguleiki enn at lata Eysturbúgvan og Vesturbúgvan landa menningarkvoturnar í Fuglafirði sigur advokaturin hjá reiðarínum.

Jógvan Páll Lassen ásannar tó, at sjálv fortreytin fyri at fáa hesar menningarkvotur var, at fiskurin skuldi skapa menning í Sandoynni.

Reiðaríið Vørðustíggjur søkti upprunaliga um 2000 tons av makreli og 2000 tons av norðhavssild um árið í fimm ár. Hesar menningarkvotur skuldu vera grundarlag fyri at nútímansgera virkið á Sandi fyri einar 20 milliónir krónur og síðani skapa arbeiði til 20 til 30 fólk.

Tá avtornaði fekk Vørðustíggjur bara ein brotpart - nevniliga 1300 tons av makreli og 1000 tons av sild - í eitt ár.

Harvið broyttust fortreytirnar, neyðugt var at hálsa um, og umsøkjarin fær loyvi til at landa menningarkvoturnar til virkið í Skopun. Eisini fær umsøkjarin loyvi til at landa tað, sum virkið í Skopun ikki klárar at taka ímóti, í Hvalba.

Men heldur ikki tað ber til. 11. oktober, 17. oktober og 26. oktober landa Eysturbúgvin og Vesturbúgvin menningarkvotur til Pelagos í Fuglafirði - sjálvt um fiskurin skuldi skapa menning í Sandoynni.

Jógvan Páll Lassen váttar, at reiðaríið Vørðustíggjur og Sandoy Seafood hava onga avtalu um treytirnar fyri at landa menningarkvoturnar í Skopun, tá Eysturbúgvin og Vesturbúgvin fara á makrelveiðu tíðliga í oktober.

Tað var annars ein fortreyt fyri yvirhøvur at fáa menningarkvotur, at kvoturnar skuldu skapa menning í Sandoynni. Vørðustíggjur er eitt reiðarí - felagið eigur einki virki. Og felagið hevur onga avtalu vid nakað virki.

-Tad bar ikki til at gera avtalu frammanundan, tí vit vistu ikki, hvat avtala skuldi gerast um, sigur Jógvan Páll Lassen.

Tí fara Eysturbúgvin og Vesturbúgvin til fiskiskap eftir menningarkvotu til Sandoynna, sum ikki kann landast í oynni. Eftir stendur reiðaríið Vørðustíggjur við menningarkvotum til Sandoynna - sum tó ikki kunnu landast í oynni. Fiskimálaráðið hevur givið reiðarínum freist til hósdagin klokkan fýra at fáa viðurskiftini uppá pláss - annars verður restina av kvotuni tikin aftur.

Í løtuni er tó einki samband partanna millum.

Hoyr samrøðu við Jógvan Páll Lassen við at trýsta á pílin undir myndini.