Undan jólum og fyri jól

Tað eru fýra orð, sum líkjast í merking og ofta verða nýtt hvørt um annað.

Orðini eru undan, fyri, innan og áðrenn. Men tey hava kortini ymiska merking.

Undan
Undan tekur hvørjumfall: 'Undan jólum hongur jólapynt allastaðni. Og jólini koma ár undan ári.'

Fyri
Fyri tekur hvønnfall, tá ið talan er um tíð: 'Vónandi verða jólagávurnar lidnar fyri jól. Nú á døgum verða jólaborðhaldini ofta hildin í góðari tíð fyri jól.'

Innan
Innan tekur hvønnfall, tá ið talan er um tíð: 'Tú mást svara innan tríggjar vikur, um tú kemur higar at halda jól.'

Áðrenn
Áðrenn var fyrr einans sambindingarorð: 'Tú mást siga frá, áðrenn tú kemur. Vit mugu keypa tilfarið, áðrenn vit kunnu fara undir arbeiðið.'

Men áðrenn er nú eisini vorðið ein fyriseting, sum tekur hvønnfall og verður brúkt í staðin fyri undan og fyri:

'Áðrenn jól hava øll úr at gera, og jólagávur, sum ikki verða lidnar áðrenn jól, verða jólatrøll!'

Her kundu vit eisini sagt: 'Undan jólum hava øll úr at gera, og jólagávur, sum ikki verða lidnar fyri jól, verða jólatrøll!'

- Tað er ikki skeivt at siga áðrenn í øllum hesum dømunum, men vit varðveita eitt fjølbroyttari mál við eisini at nýta fyrisetingarnar undan, fyri og innan, sigur Elin Henriksen, málkøn.