Løgdu hald á tvífalt so nógv hassj í fjør

- Rúsevnismarknaðurin í Føroyum er vaksandi, og tað eru ikki bara fólk í kriminella umhvørvinum, sum brúka hesi rúsevni, men eisini vanligir føroyingar.

Tað sigur Heri Andreassen, leiðari á Kanningardeildini hjá politinum.

TAKS legði í fjør hald á 17,1 kilo av hassji, sum er tvífalt so nógv sum árið fyri. 

Nøgdin á sterkari rúsevnum er eisini vaksin.

Tolleftirlitið legði hald á eitt  kilo av amfetamini, 500 LSD-frímerki, 45 gramm av MDMA og 50 gramm av kokaini.

Mett verður, at vórðu rúsevnini seld, hevði marknaðarvirðið verið 5,8 milliónir krónur.