HK: Ólóglig uppsøgn av varaálitisfólki

Hósdagin tann 28 mai segði Vága floghavn 20 fólkum úr starvi

Eitt av starvsfólkunum, sum hevur fingið eina uppsøgn, er varaálitisfólk hjá Vága floghavn.

Danska fakfelagið HK sigur, at tað skulu heilt serligar orsøkir til, um ein arbeiðsgevari ætlar at siga eitt álitisfólk úr starvi.

Arbeiðsgevarin skal eisini biðja fakfelagið um samráðing, um talan er um uppsøgn av álitisfólki, sigur Dennis Axel Jørgensen, formaður fyri HK Trafik og Jernbane. 

Møgulig sak móti Vága floghavn

HK hevur biðið Vága floghavn um at ógilda uppsøgnina. Verður hetta ikki gjørt, so leggja vit sak móti Vága floghavn um ólógliga og ósakliga uppsøgn av álitisfólki. 

Danska fakfelagið hevur biðið um fund við Vága floghavn týsdagin 2. juni. 

Vága Floghavn hevur onga viðmerking í dag

Regin I. Jacobsen váttar fyri útvarpinum, at tey hava móttikið eina kæru frá HK í gjár. 

Hann sigur, at tey ikki hava havt stundir at viðgera málið. Hetta verður gjørt í næstum, og kæran er send til okkara sakførara og onnur sum vara av málinum, sigur Regin I. Jacobsen.