- Tíðindi, mentan og ítróttur
Lena Anderssen við nýggjum staklagi
Tá Lena og Niclas seint á heysti í 2017 settu seg at leggja til rættis hennara komandi útgávu, vildu tey fegin royna at gera tónleik, ið byggir á ta synergi, sum kann íkoma, tá ein sangari og eitt orkestur framføra samstundis í studio.
“Vit spurdu okkum sjálvi; ‘hvør hevði verið ynskispersónurin at tikið upp eina slíka plátu?’ Geoff Emerick var tað upplagda svarið”, sigur Lena.
Geoff Emerick var ein slóðbrótari innan ljóðupptøkur og var við til at definera eitt gulltíðarskeið í enskum popptónleiki við fyrst og fremst The Beatles í sekstiárunum. “Tá hann játtaði at upptaka komandi útgávuna, vóru vit ikki í iva um, hetta mátti gjøgnumførast”, leggur hon aftrat.
Lagið State of the Land er sungið og spælt inn live í LAFX Studio í Los Angeles mikudag 7. mars í 2018.
Tað, sum ongin visti hendan dagin var, at State of the Land skuldi gerast seinasta plátuupptøka hjá Geoff Emerick.
Hann andaðist 2. oktober í 2018, 72 ára gamal. Og viðurkenningarnar komu úr øllum ættum.
Ein serstøk heilsan var frá Paul McCartney. “Vit brúktu nógvar spennandi tímar saman í studio, og altíð leveraði hann vøruna.” McCartney segði somuleiðis. “Hann var ein serliga góður tøkningur og vinur, og sjálvt um The Beatles høvdu nógvar góð ljóðfólk gjøgnum árini, so var Geoff ‘the ONE’.”
Hoyr sangin "State of the Land" og samrøðuna, sum Eyðfinn Jensen gjørdi við Lenu í Leygardagssendingini.
Tak niður